韓國肉類文化

1. 五花肉（삼겹살）

五花肉可以話係韓國除咗韓牛之外嘅國肉（？）亦都係韓國最常見嘅肉類，相信應該有好多人都感覺到，喺香港食嘅五花肉同喺韓國食嘅唔一樣？

喺前幾年外國人最想食嘅韓國料理排行入面，第二名就係燒五花肉，第一名係薯仔湯，果然肉就係一切。大家應該都知道，韓國五花肉就係豬嘅肚，油脂最多，燒起嚟又油又嫩，加少少鹽包住生菜一齊食真係一大享受。

因為五花肉通常唔會太厚，所以好易燒熟，亦都係小編嘅最愛。

2. 烤牛肉（불고기）

論字面上嘅意思嚟講，就係「火肉」，而韓國嘅火肉通常都係牛肉，如果係鍾意食調味嘅人就一定要食烤牛肉。

最具代表性嘅韓國調味肉類，莫過於烤牛肉。其他比較類似嘅料理就有用厚切排骨，或者係豬肉片做成唔同嘅炒肉，好啱送飯，亦都係上班族美食入面好方便嘅料理之一。

喺古代嘅韓國，烤肉通常只有皇上先可以食到嘅皇室料理，但而家已經變得好平民，唯一冇變嘅就係肉類通常都會經過醃製、炒熟之後上枱。

排骨肉都係差唔多，因為醃得入味，所以烤起嚟味道更加香、更吸引人。

燉肉喺韓國肉類料理入面，都係好常見，尤其係一啲比較傳統嘅韓式料理店，都可以品嘗到用香料慢慢熬燉出嚟嘅燉肉，都係入口即融好好食。

其實一般烤牛肉係唔會辣，通常係辣炒豬肉先會有辣度（用辣椒醬醃製），如果怕辣嘅朋友就唔好叫豬肉片（通常加辣就係為咗掩蓋豬嘅腥味）。

韓國有好多蓋飯料理，都會配上烤牛肉、辣炒豬肉一齊食，係唔係諗到就巳經流曬口水呢？

3. 豬腳、菜包肉（족발 & 보쌈）

嚟到韓國係唔係都應該要好好品嘗下韓國料理入面，好出名嘅豬腳同菜包肉呢？完全同想像中嘅唔同，真正好食嘅豬腳食落好軟同滑，唔會食到油味。

而且唔知點解，呢兩道韓國肉類料理喺夜晚，生意先會比較好，可能係感覺好啱配酒飲，所以先會咁。

但要喺呢兩款肉類美食入面，揀邊一個比較好食嘅話真係好難。菜包肉一般嚟講就係白切肉，亦即係水煮肉，味道會比較清淡、健康啲，所以食嘅時候會附上醬汁包喺菜度一齊食。韓國豬腳同香港食嘅就唔太一樣，所以有好多人嚟到韓國都愛上豬腳嘅味道。

一般嚟講，喺韓國叫菜包肉嘅話，要會送埋泡菜、蕎麥涼麵一齊食，有啲地方係包菜葉，而有啲地方係包白菜。

4. 生牛肉（육회）

呢個就應該唔洗小編介紹，就係韓國美食入面令人又愛又恨嘅「生牛肉」，通常呢種食物好唔好食，都係好主觀好難評斷。

唔只係廣藏市場常見嘅生拌牛肉，都有專門販賣生肉片嘅美食餐廳，小編食過一次，其實味道都幾唔錯反而帶有一啲甜味，只係無辦法接受生食嘅人，應該連入口都唔敢。

通常生拌牛肉都會同蛋黃、芝麻、麻油同梨一齊食，咬落輕輕脆脆，完全冇血腥味。

今日介紹咗韓國常見嘅肉類料理，無論點樣食，對肉食主義者嚟講都係美食天堂！下次嚟韓國旅行可以試多啲唔同嘅肉類料理㗎。