因明星效應而爆紅嘅產品
因為韓星用緊或講過而一夜爆紅嘅產品！韓星收廣告費咁貴唔係冇原因...
Hello，大家好 ，我哋係由韓國人每日提供最新韓國旅行資訊嘅Creatrip。
好多時我哋留意偶像嘅外表之外，仲會經常留意佢哋用緊咩產品或者著咩服飾，今日小編整理咗幾樣，因為偶像嘅明星效應而成爆紅嘅產品。
因明星效應而爆紅嘅產品
1. 我獨自生活 | 吃播女神 - 華莎
Mamamoo華莎出演韓綜《我獨自生活》嘅時候，佢自己一個喺晏晝嘅時候食牛腸，當時佢食得津津有味，更被封為「吃貨女神」。平時可能會覺得牛腸只係夜晚先食，但見到華莎唔怕任何人目光，喺晏晝都可以食得咁豐富，真係睇見都令人流晒口水。
SBS 본격연예 한밤
當時節目一播出，華莎去嘅嗰間餐廳，因為太多客人，原本可以用到10點嘅食材都提早用哂，仲要提早閂門，甚至星期日都唔做生意。聽講只要係做牛腸生意，食材都好快賣晒，當時真係令到全國嘅人都愛上食牛腸。
因為華莎令到牛腸大賣，仲獲得韓國飼養者協會頒發獎章同禮券，以表彰佢增加牛腸銷量方面巨大貢獻。唔單只係咁，佢之前食嘅紫菜米通炸片（김부각）、飯焦燉雞（누룽지 닭백숙）等，都係節目播出後，好快被掃清光。
2. 我獨自生活 | 希臘乳酪水蜜桃
喺今年8月13號，《我獨自生活》節目入面介紹咁多樣嘢之中，最令人注目嘅就係呢一個希臘乳酪水蜜桃。朴娜勑同華莎示範咗喺水蜜桃入面加希臘乳酪加蜂蜜，另外再加格蘭諾拉麥片，即刻喺網上被瘋傳。
因為做法簡單，好多人都即刻跟住去整，甚至會po相IG打卡，目前只要喺IG打相關hashtag，都可以搵到接近二萬個post。
3. 第六感（第二季） | 柿餅糯米糕
喺7月30號《第六感》第二季播出嘅呢集，因為柿餅糯米糕引起熱話，年糕入面加咗柿子乾同核桃，劉在錫食完之後仲大讚，點知喺7月31號，就已經好快賣哂，就連因為就嚟中秋太多人訂，要提早截停訂單。
4. 劉QUIZ ON THE BLOCK | 贈品
喺韓國，而家唔少年青人都鍾意送一啲所謂「冇用嘅禮物」（쓸모없는 선물」，因為有時收到都唔知點用，雖然可能會令人覺得無言，但其實都幾有趣。呢一類產品喺韓綜《劉QUIZ ON THE BLOCK》經常會見到，如果出演者答錯問題就要抽一份禮物，好多時會抽到一啲唔等使，例如雞髀坐墊、個人箍臣等。因為出演者無言嘅反應令到唔少觀眾都好好奇呢啲產品喺邊度買。甚至而家Kakao入面送禮物，都加咗一項係專賣冇用嘅禮物。
甚至喺舊年12月2號，時尚模特兒崔素拉上節目，當時佢獲得一個魚型手袋，同一對拖難，佢著上身一啲都唔覺得怕羞，仲要好enjoy，即刻喺網上唔少人都瘋狂搵。
5. 我家的熊孩子 | 寵物石
喺3月21號播出嘅《我家的熊孩子》入面，演員林元熙講話佢最近養緊竉物石，雖然喺外國非常之出名，但韓國係喺2018年先開始有，當時一上市已經有四萬幾人申請預售。
當節目播出之後又再次成為熱潮，只要喺網上打「我家的熊孩子」、「林元熙」等都會搵到相關資料。甚至有好多人喺街上執石頭，之後帶返屋企畫畫再拍vlog。
6. 西班牙寄宿 | 歐登西餐具套裝
喺2019年3月起播出兩個月嘅韓綜《西班牙寄宿》，因為佢哋用嘅歐登西餐具套裝而吸引唔少人跟住買。 簡單得嚟又高貴，特別吸引唔少20代至40代人想買返一套，當時節目播出後，出現喺Naver實時搜索排行榜，銷售額增長至78%。
7. Sky Castle | 1人Study Room
喺2018年播出嘅韓劇《Sky Castle》唔單只係韓國出名，喺外國亦都有唔少人追。呢啲Study Room一間房只可以容納一個人，想要專注學習，有自己私人空間，入到去完全唔會怕俾人打擾。
當時節目一播出，呢一種1人Study Room即刻想熱搜排行榜，即使價值超過200萬韓幣都仍然有人願意買，銷售額亦都升至10倍。最近因為疫情關係，越嚟越多學生鍾意留喺屋企溫書，唔少家庭都有為自己仔女買返一間。
8. 美味的廣場 | 醜樣薯仔
著名廚師兼主拎人嘅白種元，喺2019年12月12號，向新世界副主席鄭溶鎮尋求幫助，希望可以挽救江原道一個薯仔農場。 當時因為薯仔形狀唔夠圓，好多人都覺得醜而唔買，佢心甘情願地買咗30噸薯仔。喺第二日，Emart即刻用超平價格去賣呢啲著仔，900g只需780韓幣，好多人都唔敢相信有咁平，即刻去搶購，30噸好快就賣出。
9. BTS 柾國 - 康普茶
雖然唔係電視節目，但之前柾國喺Vlive嘅時候，就有同fans講過佢最近好鍾意飲康普茶，當時只係講完冇耐，唔少fans即刻去大量搶購。
當時一個月嘅量只需要三日就即刻賣哂，品牌銷售額增長至500%！過去亦都因為柾國講過其中一款品牌嘅柔順劑，唔使好耐都俾人搶哂。
明星效應真係唔講得少，好多產品到因為佢哋講過或者用過而一炮而紅，所以大家係咪都知點解藝人嘅廣告費會咁貴呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
