韓國人兒時玩意
以前科技未有咁發達，韓國人童年鍾意玩咩呢？《魷魚遊戲》中嘅打紙板、打彈珠係點玩？
Hello，大家好，我哋係由韓國人每日提供最新韓國旅行資訊嘅Creatrip。
每個人都有一段屬於自己嘅童年，當時科技仲未算係好發達，大家都係玩玩具多，不過大家又知唔知以前韓國小朋友都鍾意玩咩遊戲呢？就等小編而家話俾你哋知啦！
韓國人兒時玩意
1. 打紙板（딱지치기）
Netflix《魷魚遊戲》
最近Netflix播緊嘅《魷魚遊戲》中第一個出現嘅遊戲就係要打紙板。
유튜브 채널 대한민국종이접기 선생님
打紙板係朝鮮王朝流傳落嚟嘅傳統韓國遊戲，相信大家如果平時有睇開綜藝《Running Man》應該都唔陌生，佢哋成日都會玩呢隻game去對戰，紙板主要係通過兩張五顏六色彩紙不斷對折，所以睇落會有啲厚。
논산시청
佢嘅玩法係要將一張紙板放喺地下，之後用力掟自己嘅紙板，務求令將對方嘅紙板反轉，只要反轉或者超出地板上嘅線，都可以拎到對方嘅紙板，邊個越多邊個就係大贏家。
Netflix《魷魚遊戲》
베이비뉴스
喺2000年初，呢種打紙板真係相當受歡迎，當時唔少小朋友會俾心機製作成當時流行動漫同遊戲中嘅人物，相當之靚，因為佢哋怕整得唔好，就冇其他朋友會一齊玩。
2. 轉陀螺（팽이 놀이）
연합뉴스
以前科技未算太發達，所以未有電子嘅爆旋陀螺，韓國小朋友以前玩嘅陀螺係用木製整成一個尖頭小玩具，好多時都會喺冬天玩冰上陀螺，當陀螺一直轉，就要不斷用一支繩去敲佢，等佢keep住可以轉，轉得最耐就係嬴。
來源：대학내일
後嚟出現咗一個叫做纏線陀螺（줄팽이）嘅玩具，陀螺上綁住一條繩，然後將陀螺揼出去，靠繩帶動陀螺旋轉動力維持轉動。呢種陀螺尖端嵌入鋒利鐵芯，所以唔單只冬天，一年四季都可以玩到。
2000年初韓日合作動畫《爆旋陀螺》，就係以陀螺競賽為故事背景，相信唔少90後都有印象，當時應該唔少男仔都人手一個。
「三、二、一，開始！」 一邊跟住動畫口號嗌，一邊用力拉陀螺，只要陀螺轉得比對手耐，或者將對方陀螺撞出戰鬥盤就為之贏。
至今仍然都有唔少人都仲玩，就好似BTS喺《奔跑吧防彈》第96集入面，就有一齊玩「爆旋陀螺 」嘅畫場面。
3. 拋石仔遊戲（공기놀이）
拋石仔游戲係一個好耐好耐好耐之前嘅遊戲，要拎出五粒石仔之後反手捉實，其實同我哋細個以前玩嘅擲豆袋差唔多。
聽講每個地區玩嘅游戲規則都唔一樣，不過主要都係分五個階段。首先將五個全部放喺地板，先將一粒石仔向上拋，然後再一次拎起剩底4粒石仔，然後再拋出一粒，需要喺落地之前捉到。第二階段係拋兩粒、第三階段係拋三粒，如此類推。
喺第五個階段，需要拋哂五粒石，將佢哋放喺手背上後之後拋再接住佢哋。捉得越多就係大嬴家！
4. 打紙塔（학종이 따기）
大家見到呢啲顏色紙係唔係以為用嚟摺紙鶴呢？
韓國人比起摺紙鶴，佢哋更鍾意將啲紙疊成塔狀，用拍手方式將紙翻過去，雖然係好簡單，但係幾好玩！
5. 無窮花開了（무궁화 꽃이 피었습니다）
Netflix《魷魚遊戲》
呢個就好似係我哋平時玩開嘅「紅綠燈，過馬路，要小心」，不過韓國就會叫「無窮花開了」 ，只要做鬼嘅人一叫停，大家就唔准郁，郁咗就會輸。
Netflix《魷魚遊戲》
重複幾次之後，如果有人掂到做鬼嘅人，就要快啲跑返去起跑線，如果捉到其他人就會由其他人做新嘅鬼。除咗無窮花之外，口號亦可以用其他花嚟代替，例如叫：「向日葵開花！」亦都得。
6. 土地掠奪（땅 따먹기）
세이브더칠드런
土地掠奪係喺地板上畫八個正方形，之後喺每一個正方形寫數字1至8，類似我哋平時玩開嘅跳飛機。 喺開始跳之前要拋一粒石頭喺其中一個格，之後要避開，然後依照規定用一隻腳或兩隻腳跳過去，到而家仲有唔少小朋友都玩緊。
7. 打彈珠（구슬치기）
呢啲彈珠有唔同顏色，主要喺文具鋪就可以買到，佢嘅玩法係將對手粒彈珠放喺地下，之後由遠處將粒珠彈走，非常之簡單。 因為呢啲珠好有色澤，就算唔太玩彈珠嘅朋友，細個都有買佢哋嚟收藏。
Netflix《魷魚遊戲》
8. 跳橡筋（고무줄 놀이）
한국민족문화대백과사전
相信呢個遊戲大家都唔會陌生？喺香港以前應該都有唔少人玩過，玩法同香港一樣，如果一直跳得啱，橡筋亦會越拉越高。
9. 翻花繩（실 뜨기）
翻花繩主要係兩個人玩，玩法有時比想像中仲要難，一個人要先將花繩掛喺手，之後另一個人要去解，步驟錯咗嘅話繩會易會鬆或者會打結，咁遊戲就會結束！小編細個都有同同學上堂偷偷地練
10. 魷魚遊戲（오징어 게임）
Netflix《魷魚遊戲》
其實呢個遊戲喺好耐之前就已經有。喺形狀好似魷魚嘅線條入面，進攻方由腳部出發，一開始只可以用單腳行，去到魷魚中間先可以用雙腳，而喺圖案內嘅守方可以用雙腳行，但如果被拖出圖案之外，就等於輸。
而喺過咗中間之後，進攻方要由腳部攻向頭部圓圈圖案處，如果係成功抵達，就代表贏咗「魷魚遊戲」。
Netflix《魷魚遊戲》
如果想知道更清楚玩法，可以直接睇《魷魚遊戲》了解更多。
其實韓國同香港都玩嘅遊戲好多都差唔多，大家又有冇諗返起啲童年回億呢？歡迎留言話俾我哋知。
如果有更多想知嘅內容，都可以隨時留言或者dm話俾我哋知：）
Instagram：creatrip.hk