Hello，大家好，我哋係由韓國人每日話你知最新韓國旅行資訊嘅Creatrip。

熱播緊嘅《機智醫生生活》第二季，大家有冇追呢？故事講喺大學醫院工作嘅醫生嘅生活故事，唔只吸引韓國觀眾，亦都受到好多國家嘅喜愛。真正嘅醫生生活同劇中描寫出嚟嘅又有幾多成相似呢？今日就等小編為大家揭露韓國醫生每一日係點度過㗎啦！

韓國醫生實際生活

韓國人對醫生嘅睇法

韓國人非常尊敬高學歷嘅專業人士，其中醫生就最被認可，所以韓國人對醫生睇得好高！根據韓國醫師協會發佈嘅《醫療政策論壇》顯示，喺專業職業信賴度評價中，醫生以90.7%嘅可信度佔據第一位。

亦都因為咁，韓國醫生嘅社會地位非常高，而且年薪都非常豐厚，係受到學生、家長羨慕嘅職業之一。 

成為醫生嘅過程

入讀醫大

메디게이트 뉴스

成為醫生，最先要具備嘅條件就係入讀醫科大學或醫學專門研究生院。考上醫科大學係一件非常困難嘅事。 喺高中嗰3年，一定要超努力咁讀書，喺韓國大學入學考試中取得好成績。 通常高中嗰3年，年年考全校第一，或者喺大學入學試中排名頭1%嘅學生先入到醫科大學。（同香港一樣，讀醫科嘅好多都係狀元）

《機智醫生生活》中5位醫生嘅角度設定都係畢業於首爾大學醫科大學。 現實生活中，只有全國排名頭0.01%嘅學生先入首爾大學醫科大學，考到入去嘅都係天之驕子。

讀6年醫大

努力讀書考入醫科大學之後，必須經過6年嘅醫大生活，頭2年只係「預科」，即係預備醫科嘅課程。 正式學醫之前，要先讀生物學、化學、生理學等學科。 呢個時期嘅成績係唔計落醫學院嘅畢業成績，所以好多醫科生喺預科時期都會hea啲咁讀。

之後就開始「本科」嘅醫學生活，正式開始學習醫學，展開辛苦又艱難嘅課程。 雖然每間學校都略有不同，但大約每2星期進行一次考試，考試範圍同學習嘅份量都係超出想象。 

本科3年級開始去醫院實習。《機智醫生生活》入面嘅張潤福、張弘道就係本科3年級嘅實習生。

유튜브 채널 의대생 tv

醫生係人命關天嘅職業，所以醫大嘅留級制度都比其他學科更加嚴格。 就算係一科攞F，或者平均GPA低於標準嘅話就要留級，所以醫大生時時刻刻都唔可以鬆懈。

醫生國家考試

의협신문

完成晒預科2年、本科4年嘅學習之後就要考醫生國家考試， 呢個試係決定攞唔攞到醫生執照嘅國家考試。

國家試通過之後，就會攞到普通科醫生嘅執業資格，之後就開始成為專科醫生嘅學習之路。

實習1年

동아일보

首先要喺大學綜合醫院實習一年。 《機智醫生生活》第一季第3集入面，有金雋婠實習嘅場面。 金雋婠係以助理身份幫手進行胸外科手術之後，深受感動，決定去胸外科。 現實上，實習時期需要輔助各個專科，從中決定自己之後專攻邊一科。

做4年住院醫生

喺實習期間決定好自己想去嘅專科嘅話，就可以參加專科考試，除咗考試嘅分數之外，讀醫大時嘅學校成績、國家考試成績、實習成績等都會一次過做綜合評價，之後先可以入自己想去嘅專科擔任住院醫師。 《機智醫生生活》中嘅張冬天、凃材學、秋敏荷、許善彬等角色就係住院醫師。

專科考試

做咗4年住院醫師之後，就可以參加專科執業考試。 考試合格就可以獲得專科醫師資格。呢個時候，醫生大致會考慮兩個方向：一係開自己嘅私人醫院，二係好似《機智醫生生活》入面五位醫生一樣，喺綜合醫院工作，賺取月薪，即係受薪嘅醫生（Pay Doctor）。

要好似《機智醫生生活》嘅主角咁成為大學醫院嘅教授，就需要兩年時間完成專科醫生培訓課程。即係話，劇中五位主角經過醫大6年、實習1年、住院醫生4年、專科醫生培訓2年，總共13年，先升到呢個位置！真係好有毅力先得！

其他關於醫生嘅小知識

醫生薪金

咁醫生嘅薪金有幾多呢？ 首先，實習同做住院醫生期間，每月大約有350-400萬韓元左右（約HKD24,500-28,000），相當於大企業新入職員嘅起薪。 當然醫生嘅工作時間更長。

成為專科醫生之後又有幾多呢？ 

根據保健福祉部2018年發表嘅《國民保健醫療實態調查》顯示，全國醫療機關工作嘅受薪醫生，平均月薪為1300萬韓元（約HKD9萬）。同統計署所統計嘅普通打工仔平均月入300萬韓元（約HKD2萬1千）相比，多4倍以上。

醫生嘅工作時間

成為專科醫生之前，實習生同住院醫生嘅工作時間真係好長。 因為作為主治醫生，除咗要治療自己負責嘅患者，仲要繼續進修，成為專業醫生，可以話係韓國醫療系統中最差嘅工作環境。

根據韓國嘅勞動法嘅規定，一週最長工作時間係52小時，但係實習、住院醫師每星期達88小時，冇好好遵守到標準。2019年初，仲有因為連續工作36小時，勞累而死亡嘅情況發生。

聽講做咗專業醫生之後，情況就會改善好多。按規定，每日工作時間8小時，即每星期40小時。 根據韓國醫院醫生協會嘅調查結果，平均每星期工作47小時以上，如果係上級綜合醫院嘅外科醫生，佢哋每星期工作平均有71個小時。

因為除咗規定嘅工作時間之外，值班同緊急情況都不斷發生， 所以現實嘅醫生認為，《機智醫生生活大學》入面喺醫院工作嘅5個主角放工之後夾band係唔可能發生。

醫生嘅工作環境

청년의사

每1000個韓國人入面有2.3名醫生，比OECD成員國平均3.5名少1.2名，喺36個國家中處於最低水平，可見人手非常不足，所以醫生總係處於過度勞累嘅狀態。

一般醫院都有為醫療人員準備嘅飯堂，但如果有緊急情況，或者真係好忙嘅時候，連去飯堂食飯嘅時間都冇。

所以好多時只會食杯麵、麵包、餅乾等等，呢種情況係實習生、住院醫生，或者喺急診室工作嘅醫療人員更加常見。

중앙일보

要值班嘅話，就要係又窄又唔方便嘅休息室度補個小眠嚟捱落去。雖然醫生好高人工，但每日都要執行咁繁重嘅工作，真係唔係人人都做得到！

大家今日同小編一齊了解咗現實醫生嘅生活情況，唔知大家覺得同劇入面嘅感覺有冇差別呢？

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購