談及GL(女同性戀)嘅韓國影視
韓劇演同性戀俾人鬧，甚至演員出嚟道歉？韓國對LGBT有咩觀感？
Hello，大家好，我哋係由韓國人每日提供最新韓國旅行資訊嘅Creatrip。
講到非異性戀嘅電影，或者電視劇，大家可以第一時間諗到BL（男男戀），而事實上都有一啲韓劇或電影都嘗試向觀眾呈現女同性戀（GL）嘅故事。今日小編就列出幾套談及GL嘅韓劇同電影俾大家，從中睇吓女同性戀係韓國社會面對嘅現實。
談及GL(女同性戀)嘅韓國影劇
韓國對LGBT嘅睇法
雖然社會上慢慢接受非異性戀（LGBT）嘅族群，但係喺韓國嚟講，現實生活中仍然唔係好接受。可能因為宗教信仰、傳統思維等等嘅因素，講到 LGBT ，好多韓國人都持消極、負面嘅態度，所以導致喺韓國嘅LGBT，都唔敢表達出嚟。
即使係咁，韓國唔少電影、電視劇都想透過加入 LGBT 群體嘅角色作為故事中角色嘅一部分，嚟推動社會變得更加開放，比較早之前，通常都係男男戀嘅BL情節，最近多咗以女女戀嘅出現。不過限於喺電視上播出，所以無法好詳細清晰咁描述故事。
例如最近播完嘅《我的上流世界》，本身係以嫁入豪門嘅女性為主軸故事，女主角之一嘅金瑞亨飾演「瑞賢」一角，係一個隱藏自己係女同志身份嘅角色，呢種情節喺韓劇中好少見，金瑞亨接受訪問嘅時候表示呢個係佢出演呢個角色嘅原因之一。
事實上，《我的上流世界》並唔係第一部有關女同性戀嘅韓劇。《숙희 정희》 (1997)、《Lovers (연인들) 》(2002)、《Bilitis俱樂部的女兒們》 (2011) 都有講女同志嘅故事。
但係喺 2015 年播出嘅《善巖女高偵探團》 (선암여고 탐정단) 第 11-12 集，有女同志接吻嘅鏡頭，導致被韓國通信標準委員會警告話：「呢一幕係危害兒童及青少年嘅情緒發展」。
GL劇嘅故事結局
女同性戀嘅題材唔算新鮮，但好多時佢哋嘅結局都係唔好，可能係必須要喺失去所愛嘅人、自我了結、永遠隱瞞事實證明之間做抉擇，有一啲較為正向（？）少少嘅就創造一個開放或模棱兩可嘅結局。好多時候，因為媒體咁嘅安排，令人產生一種誤解，甚至俾人覺得LGBT係心理上有問題嘅人，但事實上，LGBT族群同大家一樣，好簡單咁希望可以過美好嘅生活。
最近《我的上流世界》突破咗以前講同性戀嘅結局！劇中主角「瑞賢」係一個成功人士，有頭有面，又有才華，但隱藏住自己係同性戀嘅秘密。不過劇集結局係瑞賢過上幸福嘅生活，唔似以前咁用開放式或者模糊嘅結局等觀眾自己想像。透過呢套劇，表明LGBT都可以好似其他人一樣獲得成功，開開心心咁生活。
凡事都有兩面，《我的上流社會》播出之後，受到好多宗教人士、反LGBT嘅人批評，其中一位係劇入面飾演同性戀嘅演員金晶和（김정화）甚至出面道歉，佢嘅老公更公開表示唔同意同性戀。
雖然目前對LGBT存有反對嘅聲音，但可能亦係韓國社會轉變嘅開始，慢慢對 LGBT族群持更開放嘅態度。
包含GL故事嘅電影/電視劇
下女誘惑 (아가씨)
致潤熙 (윤희에게)
與妳約定 (담쟁이)
道熙呀 (도희야)
你好德古拉 (안녕 드라큘라)
無法抗拒的他 (알고있지만)
我的上流世界(마인)
以上就係韓國談及女同性戀故事嘅電影或電視劇，以及現時韓國社會對LGBT嘅觀感。無論係咩性別，大家都有權愛自己，愛他人！🌈
如果有更多想知嘅內容，都可以隨時留言或者dm話俾我哋知：）
Instagram：creatrip.hk