權珉娥直播認係第三者
前AOA成員權珉娥直播承認介入他人感情並道歉，無故大爆前成員私生活，再次引起爭議
Hello，大家好，我哋係由韓國人每日提供最新韓國旅行資訊嘅Creatrip。
前AOA成員權珉娥喺上個月（6月）26號，個人SNS貼出同男友嘅親密照，宣佈自己戀情，但隨後被爆男方本身有女朋友，陷入做第三者嘅輿論。權珉娥當時指自己係喺男方處理好上一段感情之後先開始戀情，但男方嘅前女友公開證據反駁。最後尋日（5號）權珉娥通過個人SNS承認介入男方同女友之間感情，為此道歉。另一方面喺直播期間，大爆前AOA成員嘅私生活，引起大眾不滿同憤怒。
Instagram@kvwowv
權珉娥係個人SNS上發表：「所有嘢我都覺得好抱歉，我呼吸緊都覺得好對唔住，因為我嘅留言而引起大家嘅憤怒，真係好抱歉」，仲話：「呢10年嚟嘅痛苦對我嚟講好殘酷，我只係想講呢樣嘢」最後指想放下所有嘢，短期內會安靜咁自我反省。
Instagram@kvwowv、buffalooooo__
同時男友亦發表道歉文，為令前女友帶嚟傷害而向前女友道歉，同時承認自己對權珉娥同前女友雙方都有隱瞞，指前女友公開嘅都係事實，係自己冇處理好先會搞到呢個局面。另外澄清前女友爸爸「殺死你」嘅短訊，指理解前女友爸爸嘅憤怒，但冇直接同自己講過呢啲說話，更澄清前女友爸爸並非黑社會。留言最後寫話：「一切都係我嘅錯，希望以後唔會對任何人造成傷害。呢一切都係想隻手遮天嘅我自己攞嚟，真係好抱歉。我甘願接受對我嘅辱罵，但希望停止因為呢件事而辱罵其他人」。
Instagram@kvwowv
本應事件到呢度就應該完結，但係權珉娥喺直播時候除咗承認自己做第三者同道歉之外，又係鏡頭前展示自己自殘嘅傷痕，仲講到AOA有成員好鍾意同人發生性關係，引起話題。有網友留言話：「有成員鍾意發生性關係呢句已經被報導，好多人都討論緊係邊個，呢個簡直係性騷擾同公然侮辱，成員又一次受到傷害，你唔使為自己做嘅嘢負責㗎咩？」，權珉娥對此回覆：「係申智珉啊」，然後又del咗相關留言。
呢次事件被網友同fans回想返舊年權珉娥公開自己被成員霸凌嘅事，最初網友一面倒支持權珉娥，但一直都冇實質證據，再加埋今次嘅事件，除咗有網友擔心佢嘅精神問題，又有指佢越界、變成加害者之外，亦都有唔少網友開始質疑，認為佢口中嘅加害者，同為前AOA成員嘅申智珉其實都係受害者，表示「申智珉好可憐」、「智珉一定要告佢」、「放過智珉啦」等。
如果有更多想知嘅內容，都可以隨時留言或者dm話俾我哋知：）
Instagram：creatrip.hk