丹陽「忠清道血腸」介紹
連白種元都認證嘅丹陽「忠清道血腸」美食店！鍾意食血腸嘅朋友唔好錯過啦！
Hello，大家好，我哋係由韓國人每日提供最新韓國旅行資訊嘅Creatrip。
相信大家對白種元老師一啲都唔陌生，佢係韓國出名嘅廚師之一，佢食過都讚嘅美食更加一定係有口碑！今日小編同朋友就去咗佢之前喺節目推薦過嘅丹陽「忠清道血腸」試食，相當令人期待！
丹陽「忠清道血腸」介紹
地址：충청북도 단양군 단양읍 도전리 614
營業時間：每日 9:00 - 21:00
小Tips：由丹陽站搭巴士（방곡-단양버스），喺도전2리 구경시장입구 （九景市場）落車，行3分鐘就會到。
因為呢間鋪頭喺九景市場入面，一開始都會擔心好難搵，但因為佢比一般鋪頭大三四倍，所以好易會搵到佢嘅蹤影，而且因為好出名，如果唔知點行，都可以問下當地嘅人。
喺門口已經可以見到有電視節目介紹過，而且仲有白老師大大個名貼喺度。
一入到去都覺得呢度好闊落而且好多位（喺疫情前成日都要排隊先入到嚟）。
因為而家疫情關係，老闆好注重衞生，每一張檯上面都有鋪檯布，用完一張會再換新嘅上去。
餐牌 | 價格 |
豬肉湯飯 | 7,000 KRW |
大蒜血腸湯飯 | 7,000 KRW |
辣大蒜血腸 | 10,000 KRW |
大蒜血腸 | 10,000 KRW |
血腸拼盤 | 13,000 KRW |
大蒜血腸大腸鍋 | 23,000 KRW (中) 28,000 KRW (大) |
酒湯 | 10,000 |
一碟豬肉 | 10,000 |
因為丹陽係出名食大蒜，所以喺menu會見到好多湯飯都有加，小編最後就同朋友決定叫大蒜血腸大腸鍋（中）。
雖然呢度唔算有好多小菜，但只係食呢一鍋已經可以好夠飽！
鍋中間仲放咗韮菜同金針菇，上面仲加咗啲芝麻粉，完全就係韓國人最鍾意嘅食法！每一粒血腸都好大粒同肥美，喺等緊嘅期間真係睇到令人流晒口水......
小編拎住嘅就係大腸啦！口感好滑，佢唔會好肥，所以食多啲都唔怕
原本一開始都會驚食血腸同大腸會好腥，但因為呢度落咗好多大蒜，所以每嘅食一啖都只會食到好濃郁嘅大蒜味，一啲腥味都冇。
大家可能見到湯底咁紅一定會好辣，但小編覺得味道適中，配飯一齊食就會中和返，好好味！如果喺夜晚嚟，小編覺得可以加支啤酒或燒酒一齊飲，更加有地道嘅感覺！
如果大家本身鍾意食血腸嘅話，之後嚟丹陽就一定唔好錯過連白老師都推薦嘅「忠清道血腸」店啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk