韓國海女文化介紹
人類兩千年文化遺產，海女文化介紹，做海女原來係好高風險？
Hello，大家好，我哋係由韓國人每日提供最新韓國旅行資訊嘅Creatrip。
大家知唔知喺濟州島有一種職業，係要着住潛水服唔用工具喺海中自由活動，仲要閉氣超過2分鐘以上？呢種職業就係海女（해녀），佢哋仲喺2016年列入咗聯合國教科文組織嘅人類非物質文化遺產，係濟州島入面最有價值嘅傳統之一。
咁大家又知唔知佢哋嘅由來呢？同到底點解只係女性會做呢個職業？今日就同小編一齊了解一吓海女文化啦！
韓國海女文化
海女嘅起源
서울신문
專家推測海女起源係喺人類開始喺島嶼周圍同海上搵食物嘅原始時代開始，至今已經超過兩千年嘅人類文化歷史。而海女其實唔係淨係得濟州島先有，鄰近嘅釜山、東海、南海沿岸，甚至係日本、東南亞、俄羅斯等地，都有海女嘅相關紀錄。
喺嗰時，濟州嘅女性如果唔喺農田工作，就一定要喺海上工作，所以佢哋細細個由七八歲開始就會練習游水，15歲開始就會喺海度捉魚，一直做海女直到中老年為止。
海女主要做啲咩？
제주도민일보
通常係可以出海嘅日子，海女就會出海徒手捉魚，雖然大部份都係以年輕海女為主，不過間唔中都會有啲中老年嘅海女出海。而根據佢哋嘅程度，會分成上軍（상군）、中軍（중군）、下軍（하군）。唔同階級收入都有唔同，就以之前為例，上軍嘅收入可能係下軍三倍以上。
海女唔使依靠任何工具就可以潛落幾米深嘅海底，然後再浮出海面換氣，有啲經驗豐富嘅可能甚至會潛落20公尺嘅海底，閉氣2分鐘以上。
科學家一開始以為海裏有特殊基因，令佢哋可以閉氣咁耐。不過經過調查之後先發現，海女同一般人類冇分別，只係因為佢哋細細個就開始訓練，所以令佢哋比較熟悉水性。
유네스코한국위원회
不過而家嘅海女為咗增加工作效率，同埋降低危險因素，都會戴護目鏡，利用工具採集岩石上面嘅鮑魚、海膽等海產同海藻。
海女有咩風險？
오마이뉴스
因為海女要長時間落水工作，所以潛水夫病、耳鳴、低溫症狀都係海女必須面臨嘅風險。有時候佢哋仲要係冬天落海，危險度再增倍。
根據濟州島海女嘅說法，因為佢哋有海底升至水平面嘅時候會因為高低水壓差而變得精神不濟、意識模糊，佢哋喺呢個時候只要一個唔注意就會死。
남해의봄날
正因為係咁，所以佢哋都被稱為「生死的邊界（생과 사의 경계）」或者係「生涯最後的呼吸（생애 최후의 날숨）」，所以喺佢哋嘅民謠入面，亦都有反覆出現「在陰間小路上來回（저승길 왔다 갔다）」嘅歌詞。喺1981年，忠清南道保寧郡都發生過海女一齊出海嘅時候，被鯊魚咬死嘅慘劇。
其他地方民謠嘅歌詞入面，都有提到海女因為生活辛苦，如果生咗係女嘅話，絕對唔可以俾個女做海女，甚至係寧願殺死佢嘅悲慘講法。
點解淨係得女性做海女？
국립민속박물관
大家有冇諗過點解淨係得女仔可以做到海女？其實係同先天嘅構造有關，比起男性，女性身上嘅脂肪比較多，所以容易啲可以抵抗低溫嘅海水。不過喺朝鮮時代，都有男性擔任潛水、採集海產嘅例子，當時就稱為鮑作人（포작인）、鮑作干（포작간）或鮑作漢（포작한）。
當時嘅男性主要係捉啲比較昂貴嘅鮑魚、海螺等食物上繳國庫，所以壓力比較大，工作性質都比較危險，所以好多人做一陣就中途放棄。朝鮮時代嘅君主為咗解決呢個問題，就直接下令封鎖濟州島，強迫海女做搜集鮑魚呢個大任務。
而喺朝鮮正祖時期，佢聽聞海女有潛水夫病、耳鳴等職業病而於心不忍，唔再食佢最鍾意食嘅鮑魚，所以就有好多人知道濟州海女呢件事，就去濟州睇佢哋，就發現到即使係冬天，濟州島嘅女性都會去出海，就覺得好衝擊。
헤럴드경제
喺19世紀時，去過朝鮮半島嘅西方人就將「海女」形象帶返去自己嘅國家，就造成西方世界對「東方美人魚」嘅幻想。
而家嘅海女
오마이뉴스
濟州島海女已經成為世界上最具價值嘅人類遺產之一，不過數量就由全盛時期嘅兩萬幾位，直到而家淨係得返四千幾位。好多喺濟州島出世嘅女性都去晒首爾、釜山等大城市讀書，堅持唔做海女。所以剩低嘅海女有唔少已經係媽媽，甚至係婆婆嘅年紀，佢哋仲堅持守護海女文化，繼續出海捕捉海鮮。
喺濟州島，除咗有博物館介紹海女嘅歷史同文化背景之外，仲有好多餐廳會標榜「由海女捕捉嘅海鮮」，可以取代機械化大量捕捉魚類，亦都對生態造成比較少嘅傷害，品質亦都更加穩定。
唔知道大家睇完小編嘅介紹，有冇對濟州島嘅海女更加了解呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk