韓劇入面嘅植入式廣告（PPL）
點解套套韓劇嘅主角都鐘意食炸雞同Subway？ 或者佢哋食嘅所有嘢都係廣告？ 一齊了解韓劇入面有啲咩PPL啦！
Hello，大家好，我哋係由韓國人每日提供最新韓國旅行資訊嘅Creatrip。
對於劇集入面嘅植入式廣告，觀眾同廣告公司之間長久以嚟都有唔少嘅矛盾。有啲觀眾或者會覺得，某啲廣告植入得太刻意，令成套劇太過商業化。另一方面，好多公司就正正因為咁而不惜洗好多錢，就係為咗喺啲劇集裡面植入自己嘅廣告。只不過植入廣告嘅位置，卻可以大大咁影響產品嘅價值同節目嘅內容。
咩係植入式廣告（PPL）？
我哋成日講嘅植入式廣告，喺韓國稱為「PPL」（product placement）或者「간접광고」（間接廣告），意思係有策略咁喺劇集等嘅媒體入面，放置某一樣產品、牌子或者一個idea，而植入嘅位置同方式要夠自然，唔可以令觀眾覺得太刻意。因為咁嘅原因，植入廣告嘅位置同產品出鏡嘅時長，都係好高嘅學問，需要花費好多精力去研究最合適嘅方案。有唔少營銷人員發現，用咁嘅方法將產品或者idea潛移默化咁植入消費者腦海入面，長遠嚟睇甚至比直接廣告更加有宣傳效果。
喺韓國其實PPL已經唔係個新嘅概念，韓國亦有法律去保障大眾嘅權益。所有電視台喺做植入式廣告嘅時候，都必需遵守韓國《放送法》入面嘅第73條，唔係想點植入都得。
女神降臨
為咗得到廣告費，電視台會容許唔同嘅產品喺佢哋嘅劇集入面做植入式廣告，而呢啲劇集都需要根據韓國《放送法》第59-3條入面嘅規定。
韓國政府對於植入式廣告嘅限制
做植入式廣告嘅時候，要根據韓國《放送法》第59-3條（PPL）入面嘅規定，而第59-3條嘅定義係同第73-2條（電視廣告） 係相同嘅。只不過就算有哂明文規定，都會有啲例外。 例如一啲「意外」出現嘅品牌名稱就唔會列入廣告亦都唔受以上規條約束，所以我哋會見到有啲便利店或者cafe都會照樣出現喺韓劇入面。之但係一啲牽涉重大時事或醜聞嘅人，如果佢哋著住印有某個品牌logo嘅產品，電視台都會blur咗個logo，以免為個品牌帶來任何負面影響。
N號房主謀著住件衫嘅logo被blur
《放送法》規定，只可以喺娛樂節目先可以落植入式廣告，呢個都係點解我哋多數喺韓劇或者綜藝先睇到植入式廣告嘅原因。新聞嘅話會更加小心，確保自己係中立嘅立場（例如會blur咗啲牌子名等等） 。除非係關於某個特定品牌嘅報導，咁就唔洗blur。（當然前提係唔偏頗嘅報導 )
另外，如果係俾小朋友睇嘅教育類型節目的話，植入式廣告更加係完全禁止嘅。
其實韓國《放送法》已經算規定得好仔細，對於廣告嘅時長，有啲咩產品唔可以做PPL，連廣告產品同品牌名稱嘅size等等都有限制，但都仍然有唔少韓國嘅廣告商聰明咁搵到唔俾呢啲規則控制，又唔犯法嘅方法。例如就算演員唔可以直接講:「唔該買呢個產品啦！」，佢哋仍可以用搞gag等等嘅方式，巧妙咁引起觀眾對嗰件產品嘅關注。
The King：永遠的君主入面嘅PPL
至於分別一個產品係咪PPL嘅方法，就係睇最後credit嗰度有冇嗰個品牌嘅logo同名稱啦。
韓劇入面嘅植入式廣告
來自星星的你 （IOPE、觀光景點、炸雞）
來自星星的你入面嘅PPL
全智賢喺劇集《來自星星的你》入面用化妝品牌IOPE嘅產品係植入式廣告嘅一個例子。呢集播出之後，令IOPE產品嘅銷量增加。喺呢套劇入面出現嘅一啲觀光景點，雖然只係個無意嘅結果，但南山塔同小法國村等嘅地方都因而變成旅遊勝地。
同時小編仲記得當年因為呢套戲，炸雞亦因而爆紅，當年小編仲好記得去尖沙咀食炸雞要排好耐隊添
黑道律師文森佐 （中國食品）
黑道律師文森佐入面嘅PPL
最近有個好有爭議嘅例子就係出現喺《黑道律師文森佐》入面嘅中國品牌「自嗨鍋」。好多韓國網民都不滿咁表示，呢個PPL出現得太刻意，甚至要求tvN刪除呢個場景添。只不過令韓國網民失望嘅係，tvN同呢個品牌簽定咗合約，承諾至少要俾「自嗨鍋」出現四次。
愛的迫降入面嘅PPL
女神降臨嘅PPL
雖然是精神病但沒關係入面嘅PPL
好多tvN嘅劇集例如《愛的迫降》、《女神降臨》同《雖然是精神病但沒關係》都出現過中國品牌嘅植入式廣告，令好多韓國網民都懷疑，tvN大部分成本或者都係由中國嘅公司嚟承擔。
愛的迫降、孤單又燦爛的神－鬼怪 （BBQ炸雞）
愛的迫降入面嘅PPL
講到《愛的迫降》嘅植入式廣告，另外一個明顯嘅品牌就係「BBQ炸雞」。配角「表治秀」喺呢間炸雞鋪度做送外賣員，而劇情上一眾演員都成日會喺「BBQ炸雞」度聚餐。雖然呢個廣告做得好明顯，但韓國網民都因為《愛的迫降》搞笑幽默嘅劇情而接受呢個PPL。
孤單又燦爛的神－鬼怪入面嘅PPL
「BBQ炸雞」同樣出現喺劇集《孤單又燦爛的神－鬼怪》入面，因為角色Sunny就正正係炸雞店老闆。
太陽的後裔 （現代汽車）
太陽的後裔入面嘅PPL
另外一個引起過爭議嘅就係劇集《太陽的後裔》當中，金智媛同晉久坐喺一架現代汽車入面，再將佢set做自動駕駛嘅場景。部分觀眾覺得，呢段有啲出戲，係冇必要出現嘅情節，亦都有一啲網友甚至認為，成套韓劇根本就係政府搞嘅一個植入式招兵廣告。
The King：永遠的君主 （咖啡同泡菜）
The King：永遠的君主入面嘅PPL
《The King: 永遠的君主》係另一套因為植入式廣告而引起爭議嘅韓劇。觀眾認為植入得唔自然之外，仲成日搞到分散哂注意力，投入唔到睇劇，甚至有人話，呢套唔似係韓劇，根本成套就係一個大型廣告。
Subway
孤單又燦爛的神－鬼怪入面嘅PPL
其中一個最常喺韓劇入面見到嘅植入式廣告就係Subway啦，例如《孤單又燦爛的神－鬼怪》、《愛的迫降》、《青春記錄》同《未生》等等都有佢哋身影。
青春記錄入面嘅PPL
太陽的後裔入面嘅PPL
其他形式嘅PPL？
喺韓劇以外嘅地方，喺綜藝亦會用其他方法植入廣告。
例如，某個藝人喺拍攝嗰陣，戴咗某個牌子嘅產品，咁呢個都會喺植入式廣告嘅一種。因為比起叫藝人直接去服裝店宣傳某件衫，倒不如叫佢哋着住出演節目，再等觀眾睇到之後上網搵嚟買，咁樣仲更加有宣傳效果。
認識的哥哥入面嘅PPL
如果植入式廣告做得太明顯，反而會引起大眾嘅反感，所以取而代之嘅係，放一樽飲品喺每個《認識的哥哥》嘅出演成員嘅枱上面，等佢哋拎嚟飲嘅時候，攝影機再自然咁close up影住佢哋，呢個實際上亦都係比一般廣告更有宣傳效果嘅方法。
Running Man
Running Man
喺Running Man入面，如果佢哋着嘅團體服上面嘅logo係有貼紙遮住嘅話，咁就代表件衫唔係品牌官方贊助嘅，相反，冇貼紙直接露出logo嘅話，就係有品牌官方贊助嘅意思啦。
希望今日呢篇文可以幫大家了解PPL喺韓國唔同媒體入面嘅作用係咩，唔知大家又點睇呢？
其實關於韓劇入面嘅植入式廣告都仲係有好多嘅爭議，不過就正正係有呢啲贊助商先可以成功製作到咁多韓劇出嚟，而且呢啲廣告商都唔係大哂，佢哋都需要遵守唔同嘅規則。大家如果對呢個主題有咩意見，都歡迎留言同我哋分享！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
