釜山8間必食豬肉湯飯

Hello，大家好，我哋係由韓國人每日提供最新韓國旅行資訊嘅Creatrip。

釜山最有代表性嘅美食一定唔少得「豬肉湯飯」！釜山四周圍都有大大小小嘅「豬肉湯飯」專門店，每間都各自有佢哋嘅擁躉，今日就等小編介紹幾間私藏餐廳俾大家啦！

釜山有咩好玩？

釜山8間必食豬肉湯飯

西面站 | 松亭三代豬肉湯飯_{(송정3대국밥)}

• 地址：부산 부산진구 서면로68번길 33
• 營業時間：24小時
• 前往方法：西面站（서면역）1號出口行3分鐘

釜山最出名嘅豬肉湯飯專門店一定唔少得位於西面站附近豬肉湯飯一條街入面嘅「松亭三代豬肉湯飯」，佢係釜山歷史最悠久嘅一間，由1946年開始做生意到而家都仲係人氣不減！

豬肉/血腸/內臟湯飯（돼지/순대/내장국밥）₩9,000

因為「松亭三代豬肉湯飯」係24小時營業，所以豬肉湯飯湯底都係24小時不停熬煮，而且豬肉片嫩滑得嚟油香味濃！因為上過無數韓國美食節目，所以每到食飯時間都會大排長龍，小編個人推薦可以首選呢間試！

凡一站 | 密陽加山豬肉湯飯_{(밀양가산돼지국밥)}

• 地址：부산 동구 자성로133번길 45
• 營業時間：24小時
• 前往方法：凡一站（범일역）8號出口行6分鐘

白切豬肉（맛보기수육）₩10,000

「密陽加山豬肉湯飯」原本喺西面站都有分店，不過而家開到淨返凡一站附近呢間鋪頭，亦都係小編鍾意嘅釜山豬肉湯飯餐廳之一。好多人怕食豬肉湯飯嘅時候會有豬騷味，不過呢度嘅豬肉湯飯完全唔會！

豬肉湯飯（돼지국밥）₩9,500

釜山人食豬肉湯飯嘅時候一定會加韭菜落湯飯食，如果大家住宿會揀喺凡一站附近，不妨可以嚟「密陽加山豬肉湯飯」試吓！

海雲台 | 密陽血腸豬肉湯飯_{(밀양순대돼지국밥 부산본점)}

• 地址：부산 해운대구 구남로 28
• 營業時間：24小時
• 前往方法：海雲台站（해운대역）5號出口行3分鐘

豬肉湯飯（돼지국밥）₩10,500

「密陽血腸豬肉湯飯」本店位於釜山海雲台站5號出口附近，價錢相比頭先介紹嗰兩間餐廳會貴少少。

呢度有豬肉湯飯，亦都有血腸湯飯可以揀。味道方面，「密陽血腸豬肉湯飯」嘅湯頭會比較濃郁鹹香，唔洗點另外調味都得！

南浦洞 | 釜光豬肉湯飯_{(부광돼지국밥전문점)}

• 地址：부산 중구 대청로141번길 15-1
• 營業時間：
  • 星期一至五 10:00-19:30（Lunch Break 14:00-16:00）
  • 星期六 10:00-14:00
• 前往方法：中央站（중앙역）11號出口行2分鐘

豬肉湯飯（돼지국밥）₩10,000

外表雖然唔起眼，不過呢間位於南浦洞附近嘅「釜光豬肉湯飯」曾經上過《白種元的三大天王》，係釜山當地比較出名嘅豬肉湯飯餐廳，幾乎完全冇遊客。

SBS《白種元的三大天王》

餐廳環境就好似韓國人屋企咁非常溫馨，叫一碗豬肉湯飯亦都會有齊蝦醬、韭菜同醃蘿蔔呢幾個湯飯“伴侶”XD 「釜光豬肉湯飯」湯頭比較清，肉嘅份量亦都相當之多！

釜山站 | 本錢豬肉湯飯_{(본전돼지국밥)}

• 地址：부산 동구 중앙대로214번길 3-8
• 營業時間：09:00-20:30
• 前往方法：釜山站（부산역）6號出口行4分鐘

釜山站隔離嘅巷仔入面都有唔少豬肉湯飯餐廳，小編每次去釜山玩，準備搭KTX之前都一定會嚟「本錢豬肉湯飯」食返碗湯飯先走！

「本錢豬肉湯飯」喺度做咗40年生意，同其他豬肉湯飯最唔同嘅係呢度會落好多葱花，食落會多一陣清新葱香。而且呢度嘅泡菜都好好食夠入味，配埋湯飯一流！

沙上站 | 陜川一流豬肉湯飯_{(합천일류돼지국밥)}

• 地址：부산 사상구 광장로 34
• 營業時間：09:00-20:30
• 前往方法：沙上站（사상역）1號出口行7分鐘

INSTAGRAM @LEEJEONGGEOL_

豬肉湯飯（돼지국밥）₩9,500

鄰近釜山高速巴士轉運站同沙上站嘅「陜川一流豬肉湯飯」亦都係好多釜山當地人嘅最愛之一，特色係湯飯入面會加蒜蓉，蒜味香濃，令湯飯味道更上一層樓（而且白飯任裝XD）。

豬肉烏冬（돼지우동）₩10,500

不過小編個人覺得最特別嘅係呢度有豬肉烏冬，雖然只係由飯轉成烏冬，不過無論係口感定味道都零舍唔同！

大淵站 | 雙胞胎豬肉湯飯_{(쌍둥이돼지국밥)}

• 地址：부산 남구 유엔평화로 35-1
• 營業時間：09:00-22:00
• 前往方法：大淵站（대연역）3號出口行5分鐘

白切豬肉湯飯（수육백반）₩11,000

「雙胞胎豬肉湯飯」亦都係另一間唔可以唔提嘅釜山豬肉湯飯餐廳！名氣大到一條街就開咗兩間分店，食飯時間都一定會坐到滿曬。

半肥瘦嘅豬肉，配上香濃湯飯呢個基本配置真係好難唔好食，不過小編個人就覺得呢度豬肉味比較重，比較敏感嘅朋友們可能會覺得有少少騷。

廣安里 | 花豬肉湯飯_{(꽃돼지국밥)}

• 地址：부산 수영구 민락로 35
• 營業時間：星期一至六 09:00-21:00（Lunch Break 15:00-16:00）
• 前往方法：廣安站（광안역）1號出口

INSTAGRAM @FLOWERPORKSOUP

豬肉湯飯（돼지국밥）₩9,000

如果大家住宿會揀喺廣安里附近，或者plan住去廣安大橋、廣安里海水浴場附近玩，小編會推薦呢間「花豬肉湯飯」俾大家！

白切豬肉 小（수육 소）₩20,000

湯飯價錢中等，但係份量超大，而且肉量都唔少，最重要係唔會騷，不知不覺就會食曬成碗飯XD

以上係小編去過咁多次釜山之後歸納出覺得最值得推薦嘅釜山豬肉湯飯餐廳，嚟緊計劃緊要去釜山玩嘅朋友們記住save低呢篇blog跟住去覓食啦！

釜山旅行必備✨

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購

Mail：help@creatrip.com