聖水Cafe/必買手信「newmix coffee」介紹
鍾意飲韓國即溶咖啡？全新開張咖啡品牌newmix coffee！買返屋企做手信啱曬！
- 🎁newmix coffee 6月限定優惠🎁
- 聖水「newmix coffee」資訊
- 聖水「newmix coffee」店鋪環境
- 聖水「newmix coffee」咖啡&甜品實測
- 聖水「newmix coffee」前往方法
Hello，大家好，我哋係由韓國人每日提供最新韓國旅行資訊嘅Creatrip。
咖啡可以話係韓國人嘅「生命之水」，不過而家大部分人都淨係會飲美式咖啡，即溶咖啡逐漸被遺忘... 為咗喚醒韓國人過去50多年間，扮演重要角色的即溶咖啡回憶，「newmix」呢個牌子決定打造真正嘅「Korean Style Coffee」！
如果你仲諗緊嚟韓國玩要買咩手信返屋企好，不妨跟住小編一齊去位於聖水洞嘅「newmix」，睇吓最近首爾最hit最多人買嘅手信啦！
🎁newmix coffee 6月限定優惠🎁
- 活動時間：2024年6月12日~6月30日
- 優惠詳情：買盒裝即溶咖啡即享8折優惠
- 參加方法：Follow @creatrip.hk，Like同Save低newmix介紹影片，去到現場出示俾店員就得！
newmix coffee（뉴믹스커피）
聖水「newmix coffee」資訊
- 地址：서울 성동구 연무장3길 3
- 營業時間：11:00-20:00（逢星期一休息）
- 前往方法：聖水站（성수역）4號出口行7分鐘
韓國即溶咖啡係韓國人必備飲品之一，無論係喺韓劇、司機食堂、甚至係寫字樓Pantry都可以見到即溶咖啡包嘅蹤影，係唔少人飯後必飲嘅飲品，亦都係放鬆職場壓力嘅良藥。「newmix coffee」秉持住呢個理念，希望可以喚醒到韓國人對即溶咖啡嘅回憶。
而相信韓國即溶咖啡亦都曾經出現過喺你同我嘅韓國手信list入面，不過通常都會買比較出名嘅牌子，但係而家終於多個選擇啦，等大家可以體驗「韓國新特色」！
聖水「newmix coffee」店鋪環境
喺韓國即溶咖啡叫做「믹스커피」（mix coffee譯音），而「newmix coffee」顧名思義就係新式即溶咖啡專門店！喺聖水站4號出口行幾步路就會見到「newmix coffee」嘅黑色招牌，鋪頭門口仲有試飲booth，新潮裝修非常顯眼。
平時去Cafe叫咖啡嘅話因為要由磨咖啡豆開始，到用咖啡機整espresso，再根據客人要求整成各種口味，所以都要等好耐。不過「newmix coffee」最特別嘅地方係直接用預先調配好嘅即溶咖啡粉加熱水快速攪拌，唔洗好耐就可以嘆到一杯香濃咖啡，而且價錢方面比起一般咖啡平，一杯大約只需要₩2,500至₩3,500不等！
行入鋪頭入面會見到一面擺滿「newmix coffee」紙杯同咖啡嘅牆，新潮得嚟視覺效果夠震撼！
大家可以直接喺counter叫嘢飲/嘢食，呢度亦都有賣一包包嘅「newmix coffee」即溶咖啡，買幾多包買咩味都冇限，大家可以自由配搭。而且價錢唔貴、款式夠多，當手信咁買返去都唔會肉赤！
行入少少仲會見到有個陳列櫃，入面擺滿「newmix coffee」自家製韓國傳統米菓（오란다），冬甩形狀好特別！另外仲有杯裝嘅蜂蜜餅乾（건빵 크런치）同年糕窩夫（떡와플），睇落全部都好吸引！
推薦大家可以先喺現場叫幾款嚟試，如果有鍾意某種口味嘅咖啡或者甜品，仲可以直接買禮盒裝，無論係送禮定自用都好唔錯！
聖水「newmix coffee」咖啡&甜品實測
蜂蜜餅乾 (건빵 크런치)
單杯 ₩3,500 / 盒裝 ₩8,000
呢款餅乾係韓國最傳統嘅零食之一，平時超市賣嘅味道都比較淡，不過「newmix coffee」嘅呢款外面有一層糖漿，甜甜地，好容易食到停唔到口。
米菓甜甜圈(오란다)
單個 ₩3,500 / 盒裝(4個) ₩12,000
米菓甜甜圈有6種口味，意外地又幾好食！本身小編以為口感會似沙琪瑪咁腍腍地，但原來好脆口，而且每款口味都各有特色！如果想買零食返屋企做手信，「newmix coffee」嘅米菓無論係顏值定味道都唔錯，大家可以買4個裝（₩12,000）或者8個裝（₩24,000）禮盒返去開心share~
原味咖啡單杯 ₩2,500
其他口味單杯 ₩3,500
當然唔少得要介紹埋「newmix coffee」嘅即溶咖啡，呢度總共有提供4款口味嘅咖啡，等小編逐一幫大家實測啦！
首先招牌口味係原味咖啡（오리지널），糖、奶同咖啡嘅比例啱啱好，而且咖啡會回甘，唔係齋甜味！而綠茶味（녹차맛）唔會苦，但係香氣十足，同平時喺Cafe叫嘅即整抹茶鮮奶咖啡差唔多！
另外仲有比較特別嘅炒栗子味（군밤맛）同炒米味（볶은쌀맛），前者飲落有碳焙香氣，隨之而來仲有栗子嘅甜味，而後者帶有淡淡嘅米香，係4款口味入面小編最鍾意嘅味道（小編當日即刻買咗盒返屋企自己沖XD）！
好似頭先所講，建議大家可以先喺現場買一杯試，咁就唔怕會中伏！一盒即溶咖啡入面有10包，盛惠₩12,900，如果唔知買邊款好嘅話買原味或者炒米味一定冇衰！
雖然「newmix coffee」係外賣專門店，冇提供座位俾大家可以坐喺度休息，不過反而更加可以體驗到韓國人以前飲即溶咖啡嘅感覺，兩三個朋友一齊每人手上攞住一杯咖啡，邊行邊傾計，warm得嚟夠曬有人情味。
如果大家會去聖水洞玩，又想買特別啲嘅手信返屋企？推薦大家去最近最hit嘅「newmix coffee」行返轉，體驗真正嘅韓式咖啡啦！
聖水「newmix coffee」前往方法
聖水站（성수역）4號出口出，直行。
見到Deus Cafe之後轉左。
直行。
咁就去到「newmix coffee」啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk