外國人的士APP「TABA」教學
用自己國家/地區電話同信用卡都可以喺韓國Call的士啦！外國人的士APP「TABA」詳細使用教學
- 「TABA」係咩嚟？
- 「TABA」使用教學
Hello，大家好，我哋係由韓國人每日提供最新韓國旅行資訊嘅Creatrip。
嚟過韓國旅行嘅朋友應該都會發現，韓國真係有好多山坡斜路要上上落落，而且公共交通工具Peak Hour嘅時候真係好多人，有時候攞住行李或者行完街攞住一袋二袋要返酒店或者去下一個目的地嘅時候都幾唔方便... 早前韓國終於推出咗一款遊客專用Call的士App「TABA」，到底呢個App有咩優點，又要點用？等小編話你知啦！
想去盡韓國各地？😆
外國人專用的士APP「TABA」
「TABA」係咩嚟？
「TABA（타바）」係首爾市專門為外國人開發嘅Call的士App，以前喺韓國想用呢啲App都需要有韓國電話號碼同做個人認證，但係「TABA」嘅優點係可以直接用自己國家/地區嘅電話號碼，更加可以用當地信用卡俾錢！另外呢個App更加提供有繁體中文同英文等各種語言服務，非常方便。一齊睇吓基本使用方法啦！
「TABA」使用教學
#設定語言
Download完之後一入去就會可以揀語言，有英文、簡體中文、繁體中文、日文同泰文，大家可以根據自己喜好去揀。
#輸入個人資料及認證
下一步係新增帳戶，大家需要簡單填個人資料同電話號碼，撳上圖三角形嗰個位就可以揀用邊個國家嘅電話號碼，輸入香港就可以直接搵到+852！之後填埋密碼再撳註冊就大功告成啦！
#設定信用卡
其實因為「TABA」成個版面都係繁體中文，所以操作起上嚟都好簡單！想綁定信用卡嘅話首先要撳上圖箭嘴指住嘅掣，然後揀「付款方式」。好似頭先所講，新增嘅時候可以揀其他國家/地區發行嘅信用卡，Visa、Master、American Express、JCB都得！
#Call的士方法
大家可以直接用中文搜尋出發位置同目的地，喺上圖三角形嗰位打完中文之後會出一個list，大家記住要對清楚地方名同地址再揀（呢度會有少少中英夾雜，不過相信唔會太影響大家用）！
如果唔知道準確地址，或者你係喺一個好Random嘅位需要call的士，記住要開定位服務，然後撳上面張相入面圈住嘅地方，咁就可以直接喺地圖上面釘選你當前位置同目的地位置。
之後「TABA」就會幫你推薦幾條路線，然後亦都會提供「標準」、「寬敞」同「豪華」的士3種選擇，大家可以根據預算同自己需求去揀。地圖上面亦都會顯示附近有冇車，俾大家做參考。
另一方面，「TABA」嘅其中一個特點係可以睇埋景點介紹，輸入地址嘅時候只要撳「探索首爾的熱門目的地」，就可以睇到景福宮、南山塔等首爾各大好去處嘅介紹，仲可以直接撳「立即前往」，將呢個地方設定為目的地，呢個功能對於第一次嚟韓國嘅人嚟講好有用！
大家下次嚟韓國嘅時候不妨可以用呢個App Call的士，咁就唔怕喺街度截唔到的士啦！
仲有咩係韓國旅行必備？😉
如果有更多想知嘅內容，都可以隨時dm話俾我哋知：）
Instagram：creatrip.hk
Mail：help@creatrip.com