韓國低卡/非油炸即食麵推薦
想食公仔麵又怕肥？想罪惡感冇咁高就要食呢幾款低卡/非油炸即食麵！
- #公仔麵類
- #粉絲/蒟蒻麵類
- #刀削麵/河粉類
Hello，大家好，我哋係由韓國人每日提供最新韓國旅行資訊嘅Creatrip。
韓國有超多款即食麵，每次去超市都會睇到眼花繚亂，款款都想試，不過食得多又怕肥同唔健康... 今日小編就幫大家整理咗幾款韓國低卡同非油炸嘅即食麵，下次嚟韓國旅行記住掃返幾包返屋企啦！
韓國低卡/非油炸即食麵推薦
#公仔麵類
1. 農心辛辣麵乾麵版 [농심 신라면 건면]
마켓컬리
講起韓國公仔麵，一定唔少得신라면（辛辣麵）！早幾年農心推出咗呢款乾麵版嘅辛辣麵，因為麵比較煙韌，而且冇油炸麵嗰陣油味，所以有唔少人都話覺得好食過原版！而且仲健康啲，夜晚想食返包都冇咁大罪惡感XD
2. Pulmuone白麵、紅麵、正麵 [풀무원 백면/홍면/정면]
풀무원
Pulmuone出品公仔麵入面最出名應該係呢個系列嘅乾麵！白色包裝嘅「白麵」係海鮮牛骨味，味道香濃；紅色包裝嘅「紅麵」係牛肉冬菇味，比較似平時食開嘅韓國即食麵味；而最後綠色包裝嘅「正麵」係冬菇野菜味，佢得到Vegan認證，冇負擔之餘素食者都可以食！
3. Pulmuone花蟹湯麵 [풀무원 꽃게탕면]
마켓컬리
呢款花蟹湯麵嘅用韓國花蟹、洋葱同大葱等材料調配而成，有種食緊辣海鮮湯麵嘅感覺，平時鍾意食海鮮嘅朋友們一定會鍾意！
4. Pulmuone生麵食感 [풀무원 생면식감]
呢個系列嘅麵會叫做「生麵食感」係因為佢用嘅係非油炸麵餅，所以冇平時啲即食麵咁容易變腍，口感亦都會比較煙韌！「生麵食感」有比較粗身嘅「辣牛肉湯刀削麵」、亦都有「原味」同「辣味」2款普通湯公仔麵同「直火炸醬味」等等嘅拌麵選擇，就算係唔食得辣嘅朋友們都食到！
5. 農心炸王炸醬麵乾麵版 [농심 짜왕 건면]
11번가
跟住就嚟到炸醬即食麵嘅環節，「農心炸王炸醬麵」本身就好出名，同辛辣麵一樣早幾年出咗呢款乾麵版，味道同原版一模一樣，係更加健康嘅選項！
6. Pulmuone 炙烤炸醬麵（辣椒油味/葱油味）[풀무원 로스팅 짜장면 고추기름/파기름]
풀무원
最後小編想介紹嘅係呢款黑色包裝嘅「Pulmuone炙烤炸醬麵」，可能大家冇點見過佢，不過最近喺韓國越嚟越受歡迎，當中「葱油味」版有唔少韓國美食YouTuber都大讚過，炸醬味濃之餘加埋超香葱油，係升級版嘅炸醬即食麵！
#粉絲/蒟蒻麵類
1. 不倒翁 粉絲杯麵 [오뚜기 컵누들]
如果你問韓國人減肥嘅時候可以食咩即食麵，10個有9個都會答你「不倒翁粉絲杯麵」！佢唔單止有辣湯麵味、烏冬湯麵味，早排仲推出咗炸醬味、玫瑰忌廉辣醬味等等嘅拌麵，重點係食1個都先係1xx卡路里！最近更加推出咗韓國人最近最鍾意嘅麻辣燙味，希望下次便利店特輯有機會可以試到！
2. 農心 Noodle Fit [농심 누들핏]
「農心Noodle Fit」亦都係一款粉絲杯面，有辣炒年糕味、魚糕湯味同辣烏冬味，最高都係得150卡路里！特別係鍾意食辣炒年糕但係怕肥嘅朋友們記住一定要試！
#刀削麵/河粉類
1. 膳府 素麵/刀削麵 [샘표 국수/칼국수]
有時候想食清淡啲，呢幾款湯麵都幾唔錯！雖然得一包麵同一包湯粉+配料，不過真係有喺韓國本地餐廳食素麵/刀削麵嘅感覺~ 小編之前喺香港惠康都有見過有賣，推薦大家可以買嚟試！
2. 不倒翁 河粉杯麵 [오뚜기 쌀국수]
메가마트
不倒翁除咗頭先介紹嘅粉絲杯麵，河粉杯麵都好受韓國女仔歡迎，食落冇普通杯麵咁有負擔啊嘛！除咗比較common嘅辣味、泡菜味，仲有越南河粉同冬蔭功味，超特別！
雖然以上嘅即食麵都係用非油炸麵，相對上比較健康，不過始終好多湯包嘅鈉含量都比較高，建議大家唔好食太多，適可而止先可以食得開心又enjoy！
如果有更多想知嘅內容，都可以隨時留言或者dm話俾我哋知：）
Instagram：creatrip.hk