Personal Colour推薦髮色
連韓星都唔係染隻隻色都好睇！原來你最襯呢個髮色？
Hello，大家好，我哋係由韓國人每日提供最新韓國旅行資訊嘅Creatrip。
韓國由前幾年開始就勁流行Personal Colour（個人色彩），知道自己屬於邊type之後買衫整頭髮都容易啲揀色！今日小編就幫大家整理出每款Personal Colour最啱整同最唔襯嘅髮色，下次去染頭髮之前大家可以參考吓！
心郁郁想去做Personal Colour?
Personal Colour推薦髮色
春季暖色調（Warm Spring）
1. 橄欖啡
春季暖色調嘅推薦髮色大部份都係啡色調，而呢種橄欖啡就比較特別，啡中帶少少綠色，有時候想換一換特別啲嘅髮色不妨可以學Yeji咁染呢個頭！
2. 牛奶啡
牛奶啡可以話係最經典嘅啡色頭髮，有好多韓國女明星都係呢個髮色，睇落成個人嘅感覺會比較柔和~ 朴寶英染呢個顔色真係好襯佢嘅形象啊！
3. 金啡色
暖色調嘅朋友們通常都襯金色，所以金啡色都會係佢哋嘅首選髮色之一！
4. 橙紅色
唔想成日都係啡色頭，不妨可以學泫雅染返個橙紅色嘅頭髮，sharp得嚟睇落會更加精靈同有氣色！
5. 要避免嘅顔色 - 淺亞麻、藍黑色系髮色
因為亞麻同藍黑色都屬於冷色調，所以建議春季暖色調嘅朋友們唔好染啊，如果唔係可能會令成個人睇落好暗沉！
韓仔韓妹都喺邊度染頭髮？
夏季冷色調（Cool Summer）
1. 灰粉紅
講起夏季冷色調，小編第一個會諗起嘅顔色就係粉紅色！如果大家覺得齋粉紅色太誇張，大家可以學TWICE志效或者BTS Jin染返個灰粉紅色嘅頭髮！
2. 淺薰衣草色
Rose嘅呢個淺薰衣草色頭髮當時都引起唔少迴響，有好多人都跟咗佢染呢個髮色，夏季冷色調嘅朋友們染呢個髮色會更加顯白！
3. 深亞麻色
有時候簡單就是美！夏季冷色調嘅朋友們比起純黑色頭髮，染返個深色帶少少冷調嘅亞麻色會更加襯！
4. 亞麻灰
睇到呢度，大家應該都大概feel到夏季冷色調嘅朋友們比較襯tone down咗嘅顔色，而呢款亞麻灰亦都唔例外！TWICE SANA同ITZY留真都分別曾經染過呢個顔色嘅頭髮，cool得嚟非常有個性！
5. 要避免嘅顔色 - 黃色系、灰米色調髮色
夏季冷色調嘅朋友比較唔適合染偏暖色調嘅黃色系同灰米色調嘅髮色，下次染頭髮前記住要避免啦！
明星都幫襯過嘅Personal Colour中心
秋季暖色調（Warm Autumn）
1. 卡其啡色
講到秋季暖色調嘅代表人物，一定唔少得BLACKPINK嘅Jennie！小編推薦各位秋季暖色調嘅朋友們染頭髮之前可以參考Jennie以前嘅髮色，呢款卡其啡色就係其中一款最有代表性嘅顔色啦！
2. 朱古力啡
同春季暖色調一樣，秋季暖色調嘅推薦髮色都離唔開啡色系嘅髮色！呢款朱古力啡比起頭先介紹嘅牛奶啡顔色更加深，襯返秋季嘅嗰種穩重同cool嘅感覺~
3. 紅酒色
如果想染返個比較特別同sharp嘅顔色，紅酒色都係秋季暖色調嘅推薦髮色之一！之前OH MY GIRL嘅Arin染完呢個頭髮之後瞬間美貌升級，有好多人都話佢嘅氣質都好襯呢個髮色~ 證明頭髮顔色真係會影響一個人俾其他人嘅感覺！
4. 橙啡色
最後一個想推薦俾秋季暖色調朋友們嘅髮色係之前TWICE彩瑛都有染過嘅橙啡色，小編個人認為呢個顔色可以話係彩瑛最令人有記憶點嘅髮色！橙色同啡色本身都屬於暖色系，兩種顔色mix埋之後會冇單色咁sharp，但仍然可以keep住一種潮嘅感覺！
5. 要避免嘅顔色 - 藍黑色、灰藍色調髮色
秋季暖色調嘅朋友們記住儘量唔好染藍黑色或者灰藍色調髮色，如果唔係皮膚會睇落更加暗沉更加黃！
韓星御用髮型屋
冬季冷色調（Cool Winter）
1. 藍黑色
暖色調嘅朋友絕對唔可以染嘅藍黑色就啱曬冬季冷色調嘅朋友們啦！之前李鎮赫同莊錠欣都有染過呢個髮色，比起純黑色更加有種夢幻嘅感覺！
2. 酒紅啡色
頭先講到暖色調嘅朋友們最襯啡色，冇諗過原來冷色調嘅都可以染！之前秀智同aespa嘅Karina都有染過嘅呢款酒紅啡色帶少少紫色，比起普通啡色色溫偏冷調，所以就算係cool tone嘅朋友們都可以輕鬆駕馭！
3. 櫻桃紅
講起櫻桃紅色，點可以唔提到ITZY Yuna同Red Velvet Joy呢！呢兩位Idol都因為染咗呢個髮色而成為當時熱門話題，亦都有好多人跟風去染~ 櫻桃紅冇一般紅色咁sharp，顔色偏深，襯托返冬季冷色調嘅嗰種沉靜穩重feel。
4. 紫色
而最後呢款顔色相信唔多人有染過，但係比想像中更加襯冬季冷色調嘅朋友們！紫色可以話係冬季冷色調嘅代表顔色之一，之前TXT SOOBIN同IVE 張員瑛都染過類似髮色，俾人一種好似小精靈嘅感覺~
5. 要避免嘅顔色 - 黃、橙色調髮色
同夏季冷色調一樣，冬季冷色調嘅朋友們都唔啱染橙色同黃色呢啲屬於Warm Tone嘅顔色，染完可能會令臉部瑕疵更加明顯！
有時候覺得明星染嘅髮色好靚，但係未必每款都襯自己！下次染頭髮之前記住先查清楚自己屬於邊種色調，然後參考呢篇blog，睇吓染咩色最啱自己啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com